Nabuhinan sang isa pa gid ka kandidata ang Miss Universe competition apisar nga nagahinampot na ang koronasyon.
Ginkumpirma sang Miss South Africa Organization nga nag-atras ang ila kandidata nga si Mia Le Roux bangud sa problema sini sa ikaayong-lawas.
Sa official statement, ginpaathag sini nga indi mahapos para sa iya ang pag-withdraw apang nagapasalamat siya sa oportunidad nga makatutok sa iya recovery para maserbehan sini liwat sang bug-os kusog ang iya pungsod.
Nagpasalamat man ang beauty queen sa iya supporters sa South Africa.
“Making this decision has been incredibly challenging, knowing the dreams and hopes that have been placed upon me. However, I am deeply grateful to have the opportunity to focus on my health and recovery so that I may continue to serve my country with full strength,” kabahin sang statement sini.
Ginklaro naman sang Miss South Africa Organization nga suportado nila ang desisyon ni Mia kag ang iya health kag well-being amo gid ang nagapanguna nga prayoridad.
“[W]e stand by her side, dedicated to ensuring she regains her strength and returns to full health. Our hearts are with her as she takes the necessary steps toward recovery,” suno sa organisasyon.
Antes kay Mia, nag-withdraw man si Italy Mora sang Panama apang ginklaro sang Miss Universe organization nga ini nga desisyon ang kasunod sang evaluation sang ila nga disciplinary commission.
Biyernes, Nobyembre 15, sang ginpatigayon ang preliminary competition sa Mexico City kun sa diin ang previous winners nga sanday R’Bonney Gabriel sang USA kag Sheynnis Palacos sang Nicaragua ang nagserbe nga hosts. Domingo sang aga (Philippine time) ang koronasyon kun sa diin tinguhaan ni Chelsea Manalo nga makuha ang panglima nga Miss Universe crown para sa Pilipinas.#
