ILOILO CITY- At-large ang isa ka kandidato sa pagka-punong barangay sa Pajo, Lambunao, Iloilo matapos gintudlo nga amo ang nagtiro sa salakyan sang newly-elected barangay chairman sa amo nga lugar nga si Renato Lebuna.
Ang salakyan ang ginapanag-iyahan ni Jona Lebuna nga asawa sang punong barangay kag may tatlo pa ka kaupdanan sang natabo ang insidente pasado ‘las onse kagab-i.
Sa interview sang Bombo Radyo kay Police Major Jogen Suegay, hepe sang Lambunao Municipal Police Station, iya ginpahayag nga nagdul-ong si Lebuna sang iya nga poll watchers kagab-i kag papuli na kuntani sang ginbanggaan sa dalan.
Suno kay Suegay, base sa nakuha nga impormasyon sang otoridad, ang ginatudlo nga suspek amo si Dioscoro Lozada nga kasumpong sang biktima sa eleksyon kag nakit-an mismo sang punong barangay nga ang iya kasumpong ang nagtiro sa ila.
Sang nag-responder ang pulis, pito ka igu sang bala ang nakit-an sa salakyan apang maswerte lang nga nakaluwas ang mga biktima kag wala man nasamaran.
Ginahibalo pa sang otoridad kun ano nga klase sang armas ang dala sini.
Ginpahayag nga nagpalagyo gilayon ang suspek pagkatapos sang krimen kag nakapad-lock na ang balay sini.
