ILOILO CITY – Apektado ang kandidatura sang mga Defensor sa pagka-gobernador sang probinsiya sang Iloilo sa pagpahalin kay anay House Speaker Pantaleon Alvarez.
Ini ang pagpati ni Iloilo Fourth District Rep. Ferjenel Biron nga una na nagdeklarar sang kandidatura sa pagka-gobernador sang Iloilo.
Suno kay Biron, lauman na nga magpalapit ang mga Defensor kay House Speaker Gloria Macapagal-Arroyo karon nga wala na ang mga ini sang kapyutan bangud wala na sa puwesto si Alvarez.
Ginhatagan pagtamod man ni Biron nga nagpamalibad si Iloilo Third District Rep. Arthur Defensor Jr. nga magpakigbahin sa botohan sang gin-islan ang liderato sang Kamara.
Kaladlawan suno kay Biron ang ginhimo ni Rep. Defensor nga nagpirma sa manifesto of support para kay Arroyo sang natapos na ang botohay sa Kamara.
Wala malingkang si Biron apisar nga kaupod si Defensor sa transition team nga gintukod ni Arroyo nga amo ang magpakigsapol sa grupo nanday Alvarez kag House Majority Leader Rodolfo Fariñas.
Suno kay Biron, kabahin lang sang amo nga team si Defensor bangud kilala nga malapit sa grupo nanday Alvarez kag Fariñas.
Nahibaluan man ni Arroyo suno kay Biron kun sin-o ang mga nagboto sa iya agud mangin House Speaker.
Si Rep. Defensor ang nagatuyo man nga magkandidato sa pagka-gobernador sang Iloilo sa 2019 election.