ILOILO CITY- Nagpaandam ang Philippine Institute of Volcanology and Seismology (Phivolcs) nga posible nga may matabo pa gid nga paglupok sang Bulkan Kanlaon sa pihak sang kalmado sini nga estado kahapon.
Suno kay Mariton Bornas, chief science research specialist sang Phivolcs, malinong nga nagabuga ang Kanlaon sang abo kag naga- produce sang mahinay nga low-frequency volcanic earthquakes apang mahimo ini mag-alburuto sang hinali nga wala sang ano man nga senyales.
Pahayag niya, dako ang tsansa sang phreatic ukon pareho nga explosive events bangud ini ang kinaiya sang Kanlaon.
Matandaan nga Lunes sang gab-i sang naglupok sa sulod sang anom ka minutos ang Mount Kanlaon kag nagbuga sang abo, bato kag gas sa kataason nga lima ka kilomtro sa kahawaan.
Ginpasaka man sang state volcanology agency ang alert level para sa bulkan halin sa one pakadto sa two kag nagpaandam sang mas madamo pa nga posible nga paglupok.
Dugang pa ni Bornas nga ang Kanlaon ang delikado nga bulkan kun sa diin ang ulihi nga magmatic eruption sini ang natabo sang 1902 ukon 122 ka tuig na ang nakaligad.
