Ginpasaka na sang Philippine Institute of Volcanology and Seismology (Phivolcs) sa Alert Level II ang alert level sang Kanlaon Volcano sa Negros Island kasunod sang paglupok sini subong gid lamang nga gab-i, Hunyo 3.
Ini nga alert level ang nagakahulugan nga may yara sang “increasing unrest” sa bulkan kag ginalantaw nga may yara pa sang dugang nga “explosive eruptions” ukon posible man nga “hazardous magmatic eruption.”
Suno sa state-seismologists, ini nga bulkan nga nahamtang sa boundary sang Negros Occidental kag Negros Oriental, ang naglupok 6:51 p.m. sang ginabanta anum ka minutos. Antes sina, may yara sang na-rekord nga mga pagtay-og nga ginlaragway nga “relatively strong volcano-tectonic earthquake.”
“This means that there is current unrest driven by shallow magmatic processes that could eventually lead to further explosive eruptions or even precede hazardous magmatic eruption,” kabahin sang latest alert sang Phivolcs.
Ang mga pumuluyo sa ubos sang bulkan ang nag-report naman nga naka-eksperyensya sang ashfalls kag sulfurous odors.
Gin-abisuhan man ang publiko nga maglikaaw sa pagtinir sa four-kilometer-radius permanent danger zone (PDZ) agud mapahilayo sa mga risgo sa hinali nga paglupok, pagkahulog sang mga bato, kag pagtiphag sang duta.
“In case of ash fall events that may affect communities downwind of Kanlaon’s crater, people should cover their nose and mouth with a damp, clean cloth or dust mask,” dugang pa sa statement.
Ginhingyo man sa civil aviation authorities nga abisuhan ang mga piloto nga indi anay maglabay malapit sa summit sang bulkan.
Kaangot diri, nagmandu naman si Canlaon City, Negros Oriental Mayor Jose Cardenas sang gilayon nga pagbakwit sang mga residente sa apat ka mga barangay nga sulod sa danger zone.
