ILOILO CITY – Nagpatigayon sang duha ka adlaw nga prayer rally ang Kabus Padatoon (KAPA) Community Ministry International Inc. sa Iloilo Freedom Grandstand sa syudad sang Iloilo.
Sa interview sang Bombo Radyo kay Pastor Lino, tiglawas sang KAPA-Iloilo chapter, iya ginpahayag nga katuyu-an sang ila nga pagpatigayon sang prayer rally amo ang pagsuporta sa panawagan sang ila founder nga si Pastor Joel Apolinario.
Ginpahayag ni Pastor Lino nga dululungan nga nagpatigayon sang prayer rally ang KAPA community sa nagkalain-lain nga lugar sa pungsod.
Sa pihak sang ginapangatubang nga kontrobersiya, ginpahayag ni Pastor Lino nga katuyu-an sang ila grupo amo nga makabulig sa mga pigado.
Samtang, ginkumpirma ni Mr. Norman Tabud, pinuno sang Business Permit and Licensing Office (BPLO), nga may yara sang permit ang KAPA nga magpatigayon sang prayer rally.
Sa interview sang Bombo Radyo kay Tabud, iya ginpahayag nga nagpadala sang sulat ang KAPA community nga nagahingyo nga pahanugutan sila nga magpatigayon sang duha ka adlaw nga prayer rally sa Iloilo Freedom Grandstand.
Sa pagkamatuod suno kay Tabud, ang sulat sang KAPA ang napetsahan nga Hunyo 19 kag pagkasunod nga adlaw, gin-aprobahan ni Iloilo City Administrator Atty. Hernando Galvez ang permit agud nga makapatigayon sang prayer rally ang nasambit nga grupo humalin sang Hunyo 20 tubtub 21.
Nahibalu-an nga mismo si Presidente Rodrigo Duterte na ang nagmandu nga ipasirado ang tanan nga branch sang KAPA bangud sa lapnagon nga investment scam.
Ginkumpirma naman sang Security and Exchange Commission (SEC) nga indi rehistrado ang KAPA.
