Ginbuyagyag ni Senate Committee on Public Services Chairperson Senator Raffy Tulfo ang ginpabay-an kag palpak nga konstruksyon sang Aganan Flyover nga nagahatag sang perwisyo sa mga pumuluyo sang Iloilo.
“Bakit po nagka-problema ito [Aganan Flyover]?,” pamangkot ni Tulfo kadungan sang hearing sa upper chamber kahapon, Septyembre 18.
“Ang isang concern po nila, nag-iingat po sila na baka mangyari po yung sa similar tulay which is the Ungka Flyover. Kaya they were monitoring po yung settlement ng piers,” suno kay Engr. Lara Esquibil, Officer-in-Charge sang DPWH Central Office Bureau of Design.
Nag-ako ini nga indi siya pamilyar sa implementasyon sang regional office, apang naghando nga ang technical consultancy firm amo ang United Technology Consolidated Partnership (UTCP). Amo man ini ang kompaniya nga nagdisenyo kag nag-joint venture sa naguba nga Cabagan-Sta. Maria Bridge sa Isabela sang Pebrero 27.
Ang UTCP ang ginkontrata sang Central Office – Bureau of Design para sa structural design kag soil investigation sa Aganan.
Suno kay Esquibil, may yara sang discrepancy ukon sala nga pag-check sa kadalumon sang pundasyon nga ginpatigayon sang UTCP sa Aganan, nga wala gin-aprubahan sang ila ahensya. Bangud sini, padayon nga na-delay ang proyekto bangud sa kakulangan sang hulag sang UTCP kag padayon man nga nagaresulta sa mabug-at nga trapiko sa mga motorista kag pasahero sa Iloilo.
Nagsugod ang proyekto sang Hulyo 6, 2020 kag ginatarget nga matapos sa sulod sang 24 ka bulan ukon duha ka tuig, apang tubtub subong, wala ini matapos kag wala mabenepisyuhan sang mga Ilonggo.
Ginbulgar man nga halin sa P802 milyon nga total contract price, P308 milyon na lang ang nabilin nga budget para sa flyover. May reports pa nga dugang nga ₱275-₱300 milyon pa ang kinahanglanon nga pondo bangud sang mga rebisyon sa Aganan Flyover nga ginkumpirma man ni Esquibil nga posible nga matabo bangud sang sala nga soil testing sang UTCP.
Bangud sini, ginpahanumdom ni Sen. Tulfo kay Esquibil nga antes hatagan sang kontrata ang mga contractor kag consultancy firm, dapat nga mag-agi anay sila sa istrikto nga background check agud masiguro nga kwalipikado sila kag masarangan nila ang proyekto.
Gin-rekomenda man ni Sen. Raffy nga i-compute na sang DPWH ang mga liquidated damages bangud sang mga pagka-delay kag dapat ini sukton sa UTCP. Gin-ugyunan man ini ni Esquibil kag nagsiling nga ila ini himuon gilayon.
Bilang pagsiguro nga magahimo sang tikang si Esquibil sa mga rekomendasyon ni Sen. Tulfo, ginpasumite siya sang comprehensive investigation kag status report sang proyekto para sa masunod nga hearing sang committee.
PROTESTA SA AGANAN FLYOVER
Kahapon, Septyembre 18, sa idalom sang Aganan Flyover ginpatigayon sang lain-lain nga mga grupo ang protesta batok sa kurapsyon bangud amo ini ang ginalantaw nga nawong sang delays kag mismanagement sang infrastructure projects sa Iloilo.
Sang nagbisita si Presidente Ferdinand Marcos, Jr. sa Iloilo City sang Agosto, namunuhan niya ang amo nga proyekto bangud naagyan ini sang iya nga convoy kag nabuko nga wala pa gihapon natapos kag amo ang ginasiling nga nagapanguna nga rason sang trapiko sa lugar.
Ginpahibalo kay Presidente Marcos Jr. nga sang 2019 pa gin-umpisahan ang flyover, pero wala pa gihapon matapos bangud sayop ang orihinal nga disenyo sini kag kinahanglan pa nga kay-uhon ang idalom sang pundasyon paagi sa jet grouting.#
(—with additional information from Senate Press Release: “Failed Construction of Aganan Flyover Exposed by Sen. Raffy”)
