Madamo gid ang natandog sa istorya sang kapid nga naseparar man sa madugay nga tion, apang nagapabilin nga pareho ang pila sa ila adbokasiya kag mangin ang ila nalab-ot nga kadalag-an sa lamharon pa lamang nga edad.
Ini amo sanday Audrey Doering kag Gracie Rainsberry, pareho nga halin sa China, kag pareho nga gin-adoptar sang separado nga pamilya halin sa Estados Unidos sang Amerika.
15 ka bulan pa lamang ang duha sang sila ang gin-adopt sang summer sang 2007.
Sang amo nga tion, pareho man sanday Audrey kag Gracie nga nag-suprer sang balatian sa korason kag sang nag-abot sa US, pareho man sila nga nagpaidalom sa heart surgeries.
Isa ka dekada pa ang nagligad sang nangin interesado ang nag-adopt kay Audrey nga usisaon ang nagligad sang iya bata, kag didto sini nahibaluan nga may kapid gali ini nga si Gracie.
Sa dalayon sini nga pagpangita, natultulan sini nga sa US man na-adopt si Gracie apang lain-lain ang ila nga states.
Una nga nagkit-anay sanday Audrey kag Gracie sang naga-edad sila sang 10 ka tuig kag pareho sila nga emosyonal. Halin sadto, nagakitaay na sila sang duha ka beses sa kada tuig ilabi na sa ila birthday kag byahe pakadto sa iban nga pungsod kag paagi diri, napabilin na ang ila bond apisar separado ang ila ginapaulian nga pamilya.
Subong, naga-edad na ang duha sang 18-anyos kag pareho man nga valedictorians sa ila tagsa ka high school classes.
Nagbyahe si Gracie halin sa ila balay sa Washington pakadto sa Wisconsin agud maglantaw sa graduation ni Audrey kag amo man sini ang plano ni Audrey kun si Gracie naman ang maga-graduate.
Pareho man ang duha nga suod sa American Heart Association nga “Hearts on the Hill Fly In” bilang suporta sa organisasyon nga nagabulig sa kaangay nila nga may balatian sa korason. Daku man nga tikang ang himuon sang duha bangud updan nila ang supporters sang nonprofit agud iduso sa Kongreso sa US nga magpasar sang polisa para mabuligan ang mga estudyante, staff kag mga bisita sa mga eskwelahan nga mangin preparado pananglitan may matabo nga mga cardiac emergency.
