Masobra isa ka milyon ka mga katapo sang Iglesia Ni Cristo (INC) ang nagtipon tubtob subong sa Quirino Grandstand sa Rizal Park, Manila para sa isa ka peace rally nga gin-organisar sang relihiyoso nga grupo.
Ginpahayag sang Manila Police District (MPD) nga as of 10 a.m., indi magnubo sa 1.5 million members sang INC nga naghalin sa malapit nga probinsya sang Cavite, Quezon, Tarlac, Nueva Ecija, kag Zambales ang nag-abot sa Manila para sa National Rally of Peace.
Ang mga pagpanghanda para sa relihiyoso nga pagtililipon nagsugod na sang nagligad nga semana, nga may mga pulis kag K-9 unit nga gindeploy sa lugar. Ang mga portable nga kasilyas ginbutang man sa lugar.
Una na nga nag-anunsyo ang INC nga magahiwat sang peace rally agud suportahan ang panindugan ni President Ferdinand Marcos Jr. batok sa pag-impeach kay Vice President Sara Duterte.
Sa karon, tatlo ka mga reklamo sa impeachment ang ginapangatubang ni Duterte nga lunsay may kaangtanan sa indi maayo nga paggamit sang pundo sang publiko kon sa diin ginpanginwala man ni Duterte ang mga alegasyon.
Una diri, nagpabutyag sang paglaum ang Malacañang nga ang “National Rally for Peace” sang Iglesia Ni Cristo ang magadala sang katin-awan sa mga isyu nga gina-atubang sang pungsod sa karon.
Sa isa ka pahayag, si Executive Secretary Lucas Bersamin nagsiling nga ang malinong nga pagtipon isa ka “bedrock right,” nga ginagarantiyahan sang 1987 Constitution, nga ginahatagan importansya sang mga tawo, kag tayuyon nga ginasakdag sang administrasyon ni Marcos.
Nahibaluan nga ang mga katapo sang INC nga yara sa Quirino Grandstand sang Lunes sang aga nag-apelar sang paghiliusa kag kalinong sa tunga sang political rift sa pungsod.
