Ginpaidalom sa lockdown ang City Engineer’s Office sa syudad sang Passi epektibo subong nga adlaw, Oktubre 21, matapos nagpositibo sa coronavirus disease 2019 (COVID-19) ang isa ka regular employee sang nasambit nga talatapan.
Sa interview sang Bombo Radyo kay Passi City Mayor Atty. Stephen Palmares, iya ginpahayag nga ang nagpositibo ang isa ka 46 anyos nga lalaki, residente sang Barangay Agdayao sa amo nga syudad.
Suno kay Mayor Palmares, nagabatyag sang hilanat kag nadulaan sang panamil ang nasambit nga pasyente apang ‘improving’ na subong ang kondisyon sa quarantine facility sang syudad.
Indi pa matumod kun sa diin nakuha sang pasyente ang infection bangud wala man ini nakaclose contact sa iban nga nagpositibo sa amo nga syudad, apang suno kay Palmares, nakapadulong ang amo nga empleyado sa syudad sang Iloilo sang nagligad nga semana.
Bwas, Oktubre 22, natalana nga ipaidalom sa swab test ang tanan nga empleyado sang City Engineer’s Office lakip na ang naka-close contact sang pasyente sa iya barangay sa Agdayao.
Ginabanta 100 ka tawo suno sa alkalde ang ipaidalom sa RT-PCR test.
Required ang negative test result sang RT-PCR antes pahanugutan nga makabalik sa trabaho ang ginabanta 60 ka empleyado sang amo nga opisina.
As of October 21, ang syudad sang Passi ang may yara sang 10 ka active cases sang COVID-19.
