GUIMARAS – Makabaton na sang ayuda halin sa AC Energy ang pila ka mga residente sa banwa sang Buenavista, Guimaras sa masunod nga semana.
Ini ang kabahin sang cash assistance nga ihatag sang kumpaniya matapos ang natabo nga oil spill sang nagligad nga Hulyo kasunod sang paglupok sang ila power barge sa Barangay Bo. Obrero, Lapuz, Iloilo City.
Sa interview sang Bombo Radyo kay Buenavista Mayor Eugene Reyes, iya ginpahayag nga “kapin 100” ka claimants sa Barangay Taminla sa ila nga banwa ang inisyal nga makabaton sang cash assistance.
Suno kay Reyes, sa iya inisyal nga impormasyon, sa masobra 8,700 ka claimants sa Iloilo kag Guimaras, 1,000 lang ang mahatagan sang ayuda sa una nga semana sang Disyembre.
May yara suno sa iya sang 1,900-plus ka claimants nga na-disqualify kag kinahanglan pa i-revalidate sang mga tiglawas sang AC Energy bangud posible nga kulang ang napasa nga mga dokumento.
Gin-athag sang alkalde nga magadiretso sa claimants ang ayuda paagi sa tseke bangud naga-facilitate lang suno sa iya ang local government unit.
