Naglab-ot na sa kapin 40 ka mga pamilya ukon 153 ka mga indibidwal ang ginpang-evacuate sa Batad, Iloilo bangud sa epekto sang Bagyo Kristine.
Sa interview sang Bombo Radyo kay retired Police Colonel Cornelio Salinas, pinuno sang Provincial Disaster Risk Reduction and Management Office, iya ginpahayag nga ini nga mga pamilya ang nagaistar sa mga areas nga ginabaha samtang ang iban ang nagaistar sa higad sang baybay.
Suno kay Salinas, ang iban sa ila nagatinir subong sa gymansium kag barangay hall samtang ang pila sa ila ang ginpili nga magtinir anay sa ila mga himata kag kaingodbalay.
Samtang, ginpahayag ni Salinas nga sa subong, lunsay passable pa ang tanan nga mga dalan kag taytay sa probinsya.
May mga dams naman nga hugot nga ginabantayan bangud sa pagtaas sang lebel sang tubig nga amo ang Aganan Dam sa San Miguel kag Sta. Barbara Dam.
