Kapin 200 na ang patay, masobra 700 ang pilason kag madamo pa ang missing bangud sa baha nga nagluntad sa Germany.
Samtang nagataas ang numero sang mga napatay, wala man nakahibalo ang pungsod kun ano ukon sin-o ang basulon — climate change ukon ang mga political leaders.
Suno kay Bombo International Correspondent Aimee Andaya Hilger direkta sa North Rhine-Westphalia , Germany, antes pa man natabo ang tuman nga pagbaha, adlaw-adlaw lang naga-ulan sa nasambit nga pungsod kag wala man sang storm warning.
Bangud sa ulan, nagdamo ang tubig sa dam kag nag-overflow.
Gin-ako ni Hilger nga wala gid nakapreparar ukon nakapangaman ang kadam-an sa mga pumuluyo ilabi pa nga gab-i nag-umpisa ang pagtaas sang tubig baha.
Sa subong, wala na sang ulan sa lugar apang mahangin lang sa gihapon kag nagapadayon man ang monitoring sang otoridad.
Makabalik lang ang mga evacuees sa ila tagsa ka mga balay dugang pa ni Hilger sa tion nga masiguro na ang ila safety.
