BUENAVISTA, GUIMARAS – Nagpaidalom sa massive drug testing ang Buenavista, Guimaras.
Sa interview sang Bombo Radyo kay Buenavista Mayor Euegene Reyes, iya ginpahayag nga kaupod ang Barangay Anti-Drug Abuse Council (BADAC) kag Philippine National Police, natigayon nga ma paidalom sa drug test ang 290 ka mga barangay tanod sa Buenavista.
Ginkalipay man sang alkalde bangud ang tanan nga mga barangay tanod sang nasambit nga banwa ang lunsay negative sa drug test.
Suno kay Reyes, ini lamang ang nagapakita sa hugot nga kampanya sang Buenavista batuk sa iligal nga droga sa bulig man sang mga barangay officials.
Apang gin-athag sang alkalde nga wala pa matapos ang drug testing bangud padayon ini nga igapatuman sang banwa.
Nagpasalamat man si Mayor Reyes sa Department of Health nga naghatag sang kit agud nga masuportahan ang kinhanglanon sang Buenavista.
