ILOILO CITY- Naka-isolate subong ang kapin 300 ka mga pasahero sang eroplano nga ginsakyan sang duha ka mga indibidwal nga nagpositibo sa Omicron COVID-19 variant sa Australia.
Suno kay Bombo International Correspondent Denmark Suede direkta sa Sydney, Australia, iya ginpahayag nga naghalin sa southern Africa kag nag-abot sa Australia sakay sa Qatar Airways flight via Doha ang 260 ka mga pasahero.
Sang ginpaidalom ang mga ini sa COVID-19 test, 14 ang nagpositibo kag duha diri ang may na-detect nga Omicron coronavirus strain.
Ang duha ka positive cases ang lunsay asymptomatic kag fully vaccinated.
Ang eroplano nga sakay sang infected passengers ang nag-abot sang Nobyembre 27, ang mismo adlaw nga gin-anunsiyo man sang Australia ang pag-ban sang flights gikan sa siyam ka southern African countries nga ginalakipan sang South Africa, Zimbabwe,Lesotho, Botswana, Mozambique, Namibia, Eswatini, Malawi kag Seychelles.
Tanan nga byahero gikan sa amo nga mga lugar ang kinahanglan nga magpaidalom sa 14 ka adlaw nga quarantine.
Nahibaluan nga ang pag-abot sang bag-o nga variant ang natabo isa ka bulan matapos gin-lift sang Australia ang pag-ban sa mga citizens nga nagabyahe sa overseas nga wala sang permission, kag kasunod man sang plano nga buksan ang border sang pungsod para sa mga skilled workers kag international students sa katapusan sang tuig.
