ILOILO CITY- Naglab-ot sa kapin 4.9 milyon ang mga botante nga ginpanas sang poll body gikan sa voter’s list bangud sa pila ka mga rason.
Sa data nga ginpagwa ni Comelec Chairman George Erwin Garcia, tubtob Abril 15, 2024, nagalab-ot na sa 4,903,415 ang deactivated voters kag indi makaboto sa 2025 National and Local Elections (NLE).
Kadamuan sa mga deactivated voters ang ginkakas sa listahan matapos nga mapaslawan nga magboto sa duha ka magkasunod nga eleksiyon nga yara sa 4,898,744.
Naglab-ot naman sa 1,003 nga botante ang ginkakas bangud indi ma-validate ang rekord samtang 3,663 ang na-deactivate sa idalom sang kategorya nga “Excluded per Court Order”.
May mga botante man nga ginkakas bangud indi na sila Filipino citizen.
May gin-deactivate sa idalom sang kategorya nga “Sentenced by Final Judgment of Having Committed Any Crime Involving Disloyalty to the Duly Constituted Gov’t, or Any Crime Against National Security”.
Isa naman ang “Sentenced by Final Judgment to Suffer Imprisonment for Not Less Than One Year.”
Mahimo naman nga magpa-reactivate sang ila rehistro ang mga deactivated voters agud makaboto sa masunod nga eleksyon.
Kutob sa Setyembre 30, 2024 ang ginapatigayon nga voter registration sang poll body.
