NORWAY – May yara sang penalidad nga baydan ang sin-o man nga naka quarantine nga maguwa sa balay sa Norway samtang ginapatuman ang lockdown.
Sa interview sang Bombo Radyo kay Bombo International Correspondent Jenalyn Tarife direkta sa Norway kag tumandok sang Bugasong, Antique, iya ginpahayag nga sin-o man ang madakpan nga naka quarantine apang naguwa sa balay ang pagamultahan sang 20,000 Norwegian Kroner ukon kapin sa P100,000.
Suno kay Tarife, gin-extend ang lockdown sa Norway tubtob sa Abril 13 sa diin may yara na sang 3,988 ka mga positibo nga kaso sang coronavirus disease 2019 samtang 23 naman ang patay.
Bangud nga lockdown, sirado na ang tanan nga mga buluthuan, bars, restaurants kag ginadumilian ang public events magluwas lamang sa mga pharmacy kag grocery stores.
Apisar nga lockdown, wala sang general order sa publiko nga magsuksok sang mask bangud lunsay ang mga may balatian lamang ang nagakadapat nga magsuksok.
Hugot man nga ginapatuman ang pagbantay sa mga border sang pungsod agud nga indi makasulod ang iban nga mga kaiping nga lugar sa Europa.
