ILOILO CITY – Naglab-ot sa kapin 500 ka mga tawo ang nadakpan nga naglapta ukon naghaboy sang basura samtang ginaselebrar ang Dinagyang Festival 2020.
Sa interview sang Bombo Radyo kay Iloilo City Environment and Natural Resources Office (CENRO) head Engr. Noel Hechanova, iya ginpahayag nga 90 porsyento sa mga nadakpan ang first offenders kag kalabanan sa ila ang mga pangayaw lang sa syudad.
Ginmultahan ang mga ini sang P500 kag sa subong, yara pa lang sa 40% ang nakabayad suno sa opisyal.
Samtang, ginkalipay man sang natungdan nga may mga positibo nga komento ang katinlo sang syudad samtang ginapatigayon ang selebrasyon.
Suno kay Hechanova, nagkooperar man ang mga vendors bangud nagbutang man ang mga ini sang basurahan sa atubang sang ila mga pwesto.
Sa bahin sang CENRO, 340 ka mga personnel ang gindeploy agud mapabilin sang kalimpyo paagi sa pagpanilhig, pagpulot sang basura, kag iban pa.
May ginpahamtang man nga 300 ka mga kaing kag 60 ka mga drum sa palibot bilang kabahin sang anti-littering campaign.
Suno pa kay Hechanova, maathag nga malayo ang sitwasyon sang palibot subong nga tuig ipaanggid sang nagligad nga mga tinuig, bangud mas istrikto na ang pagpatuman sang mga pagsulundan.
