Naglab-ot na sa masobra 5,000 ka mga Ilonggo ang naapektohan sang malain nga tyempo sa Iloilo nga dala ni Bagyong Kristine.
Sa interview sang Bombo Radyo kay Retired Police Colonel Cornelio Salinas, head sang Iloilo Provincial Disaster Risk Reduction and Management Office (PDRRMO), iya ginpahayag nga naka-turn over na sila sang welfare goods sa Iloilo Provincial Social Welfare and Development Office (PSDWDO).
Lakip na diri ang canned goods kag sinako nga mga bugas.
Suno kay Salinas, ang nasambit nga talatapan na ang may otoridad nga maka-facilitate sa mga ginhatag nga bulig.
Gintumod man sini nga nagmando si Iloilo Governor Arthur Defensor Jr. nga hatagan sang prayoridad ang pila ka mga Island Barangay sang Concepcion kag Carles.
Padayon naman nga iga-monitor sang talatapan ang pila ka mga banwa sa probinsya apisar nga naguwa na si Bagyo Kristine sa Pilipinas.
