ILOILO CITY – Ginakabig sang probinsiya sang Iloilo nga dako nga bulig para sa pag-angkon sang ginasigahom nga rabies-free Iloilo province, ang balor P9.8 million nga anti-rabies vaccines nga ginhatag para sa probinsiya.
Ginpahayag sa Bombo Radyo Iloilo ni provincial veterinarian Dr. Sylvinno Teodosio, nga sarang maka-immunize sang 70 percent sang 252,000 ka mga ido sa probinsya ang 16,344 vials sang anti-rabies vaccines.
Target naman sang ahensya nga matapos ang vaccination sa bug-os nga 1,721 ka mga barangay sa probinsya, sa bulan sang Mayo.
Nahibaluan nga sang nagligad nga tuig, naglab-ot sa 28,919 ka kaso sang mga nakagat sang ido ang na-record sa probinsya sa diin may isa nga biktima nga napatay.