ILOILO CITY – Nagalab-ot sa kapin P1.8 million nga balor sang ginapahayag peke nga pesticides ang nakumpiska sa ginpatigayon nga entrapment operation sa Barangay Bantud, Dumangas, Iloilo.
Nakumpiska ang mga peke nga pesticide gikan kay Pablo Dimaisip, residente sang nasambit nga lugar.
Nabaklan si Dimaisip sang isa ka kilo sang ginapahayag Bristan powder sa puluy-an sini, sa ginpatigayon nga entrapment operation sang Criminal Investigation and Detection Group (CIDG), Maritime Police, Department of Trade and Industry, Fertilizer and Pesticide Authority kag Dumangas Police Station.
Nakuha man gikan diri ang 271 ka pakete sang mga peke nga pesticide nga natalana ipaidalom sa analysis kun may ginadumilian nga organotin compound.
Ang Bristan powder ang gina-gamit sa pagtapna sang kuol sa mga humayan.