Nagalab-ot sa masobra P341-million nga revenue ang nadula sa Metro Iloilo Water District sang 2025 bangud sa halos 47% nga non-revenue water, sandig sa audit report sang Commission on Audit (COA).
Suno sa COA nga sang 2025, naglab-ot sa 46.83 percent ang non-revenue water (NRW) rate sang MIWD nga mas mataas sa 35 percent nga target sang joint-venture contract sang Metro Pacific Iloilo Water (MPIW).
Ini ang masobra doble sa 20-percent maximum acceptable level nga gintalana sang Local Water Utilities Administration (LWUA) guidelines.
Nahibaluan nga sang 2019, nagsulod sa isa ka 25-year joint venture ang MIWD kag Metro Pacific Water para sa operasyon sang MPIW bilang water distribution utility sa siyudad kag pila ka bahin sang probinsya sang Iloilo.
Base sa 2025 monthly production data sang MIWD, 28.92 million cubic meters sang tubig ang ila ginakuha sa ila sources, apang 15.38 million cubic meters lamang ang nasukot kag 13.55 million cubic meters ang wala na bill.
Sa prevailing minimum water rate nga P252.00 kada 10 cubic meters, gina estimate sang COA nga katumbas sang P341,334,132.80 ang revenue nga nadula sa MIWD bangud sa unbilled water.
Suno pa sa COA, ang nadula nga revenue ang sarang pa kuntani magamit sang MIWD sa pag finance sang mga proyekto kag iban pa nga mga aktibidad nga makapaayo sang ila operasyon.
Sa pihak nga bahin, gintumod nga mga rason sang MIWD sa ila mataas nga NRW ang nagaka-usik nga tubig bangud sa mga nagatagas nga linya, depektibo nga mga water meters, sala nga reading sang metro kag billing records, kag atrasado nga pagkuha sang mga permits agud makaayo ang mga leaks.
Ginpahayag naman sang COA nga nagatuyo ang MPIW nga mangayo sang extension sa ila timeline agud malab-ot ang 20-percent NRW target nga natalana kuntani sa 2039.
Nagpaandam pa ang COA nga ang padayon nga mataas nga NRW rate ang makahalit sa financial viability sang korporasyon kag sa equity interest sang gobyerno.
Ginrekomenda man sang COA sa MIWD nga i review ang ila NRW Reduction Program kag i require and MPIW nga mag submit sang catch-up plan, hugot nga i monitor ang monthly NRW rates, kag mag-coordinate sa mga opisyal sang korporasyon kag gobyerno agud mapadasig ang implementasyon kag malab-ot ang gintalana nga 20-percent NRW level.
