ILOILO CITY- Nagdangat sa kapin P40M ang balor sang halit sa humayan nga natuga sang lapnagon nga pagbaha sa Iloilo sang damlag lang.
Sa interview sang Bombo Radyo kay Atty. Hansel Didulo, Department of Agriculture Assistant Secretary for the Visayas, iya ginpahayag nga sa data nga ginpalab-ot sa iya opisina, yara sa P 38,245,624.00 ang balor sang mga humay nga nahalitan.
Suno kay Didulo, masobra naman sa 2,000 nga mga mangunguma ang naapektuhan.
Sa Lemery, 2312 ka mga mangunguma ang apektado sa 14 ka mga barangay; sa Barotac Viejo, 245 ka mga mangunguma ang apektado sa walo ka mga barangay; kag sa Banate, 47 ka rice farmers ang apektado sa 22 ka mga barangay.
Ginpasiguro naman sang natungdan nga magahatag ang Department of Agriculture sang mga binhi gikan sa buffer stock nga nakastandby.
May mabaton man nga damage claim ang mga rice farmers nga nag-avail sang insurance sa Philippine Crop Insurance Corporation.
Gin-engganyo man sang opisyal ang mga mangunguma nga wala pa makareport sang damage sa ila humayan nga magpadulong sa ila Municipal Agriculture’s Office agud madokumento ang ila mga humayan kag mahatagan sila sang bulig.
Magluwas sa rice farmers, may ihatag man nga mga binhi sa mga corn farmers nga nahalitan man ang ila mga tanom nga mais.
