Na-transfer na sang sang Department of Health (DOH) Region VI sa local governments units (LGUs) sa Western Visayas ang P684.373 million nga pondo para sa Special Risk Allowance (SRA) sang health workers nga direkta nga naga-cater ukon in-contact sa COVID-19 patients.
Sa interview sang Bombo Radyo kay Christine Abuzo, accountant III sang DOH Region VI, iya ginpahayag nga P462.64 million ang na-transfer nga pondo sa mga LGU para sa SRA sang health workers sang Septyembre 1 tubtob Disyembre 17, 2020 kag P221.733 million naman ang pondo nga gin-release para sa Disyembre 18, 2020 tubtob Abril 30, 2021.
Wala naman ginpahat-pahat ni Abuzo ang numero sang health workers nagikan sa pampubliko kag pribado nga mga ospital apang gin-athag niya nga may yara sang “hundreds of recipients” ukon linibo ang nakabaton sang SRA.
Samtang ginpat-od naman sang Human Resource Management Officer (HRMO) sang DOH Region VI, nga ginaproseso kag gina-facilitate ang pag-release sang SRA sa tion nga napasa na sang mga LGU kag pribado nga ospital ang mga kinahanglanon nga dokumento.
Sa interview sang Bombo Radyo kay Genevieve Cadornigara, iya ginpahayag nagakadapat makapasa ang kada LGU sang lista sang pangalan sang mga eligible health workers, memorandum of agreement (MOA), kag resolusyon nagikan sa Sangguniang Bayan agud gilayon nga ma-proseso ang pondo.
Apang sa tion nga ma-delay ang mga dokumento ukon ang pagpasa sini, nagaka-ulihe man ang pag-release sang SRA.
Gin-ako man niya nga gin-igo sang COVID-19 pandemic ang pila nila ka mga personnel, rason nga naapektuhan man ang pag-proseso sang SRA para sa mga health workers sa rehiyon.
Sa pihak sini, ginpahayag niya nga na-release na ang SRA sang health workers sa Iloilo Province.
Apang wala pa napagwa ang pondo para sa Iloilo City.
Nahibaluan nga indi magnubo sa P5,000 kada bulan ang ginahatag sa mga health care workers nga ‘physically’ naga-report sa trabaho sa public hospitals, laboratories, ukon medical kag quarantine facilities lakip na ang health workers sa DOH-certified private hospitals.
