ILOILO CITY- Nagdangat sa kapin P9 million ang balor sang ginbilin nga halit sang apat ka sunod-sunod nga sunog nga nagluntad sa Iloilo City.
Sa nasunog nga residential structure kag salakyan nga ginapanag-iyahan ni Godofredo Defensor sa Brgy. Sta Cruz, Arevalo, P1.6 million pesos ang balor sang halit.
Sa nasunog nga two storey residential structure nga ginapanag-iyahan sang Resano family sa Burgos, La Paz, yara sa P4.3 million ang estimated nga damage.
P2 million pesos naman ang balor sang halit sa kapin 20 ka mga balay nga nasunog sa Brgy. General Hughes, Iloilo City Proper.
Sa bahin naman sang nasunog nga two-storey residential building sa Sta. Rosa Subd., Tagbak, Jaro, yara sa P971,000 ang balor sang halit, kag sa amo nga sunog, may narekord nga isa ka casualty.
Sa interview sang Bombo Radyo kay Teresa Gelogo, head sang City Social Welfare and Development Office, iya ginpahayag nga padayon ang paghatag sang bulig sa mga apektado nga pamilya nga nagapabilin sa evacuation center.
Suno sa iya, may ihatag man nga P10,000 cash assistance sa mga totally burned nga balay kag P7,000 sa partially damaged nga mga puluy-an.
