ILOILO – Kapin sa 200 ka Locally Stranded Individuals ang natalana nga maga-abot sa Iloilo buwas nga adlaw, Hulyo 18.
Ang nasambit nga balita ang ginkakibot naman ni Gov. Arthur Defensor Jr. kasunod sang pagpadala sang appeal letter sang League of Municipalities of the Philippines sa National Inter-Agency Task Force nga ipauntat anay ang byahe sang returning residents.
Sa interview sang Bombo Radyo kay Defensor, iya ginpahayag nga 198 ka Locally Stranded Individuals ang magapauli halin sa Metro Manila sakay sa barko.
Suno kay Defensor, ang Philippine Coast Guard ang nagpahibalo sa iya kag bisan ang nasambit nga ahensya sang gobyerno ang ulihi na nakahibalo tuhoy sa nasambit nga trip.
Ginpahayag ni Defensor nga apisar wala sang proper coordination, wala siya sang may mahimo kundi batunon ang mga magapauli nga Ilonggo.
Gin-athag sang gobernador nga wala niya ginapamatukan ang pagbyahe pauli sang mga Locally Stranded Individuals kundi ang iya lamang amo nga nakapreparar ang tagsa ka Local Government Unit.
Kun organisado ang pagpauli sang mga Locally Stranded Individual, malimitahan man ang local transmission rate sang COVID-19.
