𝗠𝗔𝗡𝗜𝗟𝗔 —Wala pa maka-renew sang ila lisensya sang pusil ang kapin sa 26,000 ka mga katapo sang kapulisan kag militar sang pungsod.
Suno kay Philippine National Police – Civil Security Group (CSG) spokesperson PLt. Col. Eudisan Gultiano, ang mga pulis nga wala naga-renew sang ila License To Own and Possess Firearms and Firearms Registration (LTOPFF) mahimo nga magapangatubang sang mga kaso administratibo, ilabi na subong nga gin-streamline na sang PNP ang proseso para sa mga aktibo nga personnel.
Gin-athag man ni Gultiano nga isa pa ka rason sa exemption para sa mga pulis amo nga regular ang mga ini nga ginapaidalom sa drug test subong man sa psychological kag psychiatric examinations, ilabi na kun naga-apply sila sa promosyon ukon nagatambong sa training.
Bilang kabahin sang ila internal cleansing drive, nagapatigayon man sang random drug test ang PNP sa mga opisyales kag tinawo sini.
Ginpahayag man ni Gultiano nga magluwas sa nasambit nga kaso, may yara man sang administrative on revocation and cancellation sang licenses.
Sa banta man sang natungdan, bastante ang tikang para sa pagkontrol ukon pagdisiplina sa mga aktibo nga mga tinawo sang gobyerno.
Apang ginklaro sang Philippine National Police – Civil Security Group nga kinahanglan sa gihapon nga magpaidalum sa drug test kag neuro-psychiatric evaluations ang mga sibilyan.
Nahibaluan nga santo sa data sang Civil Security Group, ang expired nga License to Own and Possess Firearms and Firearms Registration may kabug-usan nga 26,287 ka mga katapo gikan sa PNP (nga may 11,853) kag AFP (nga may 14,434) samtang ang expired firearms registration may 54,751 lunsay gikan sa PNP kag AFP.
