ILOILO CITY – Nagalab-ot na san kapin sa 300 ang mga pamatan-on nga nangin katapo sang Project BONG ukon Bringing Order to the Nemesis of Gang sang Iloilo City Police Office.
Sa interview sang Bombo Radyo kay Police Chief Master Sergeant Ruth Laudato sang Women and Children Protection Desk sang Iloilo City Police Office, iya ginpahayag nga ang pagtukod sang Project BONG ang gin-umpisahan sang 2016 kag ginatawag na sa subong nga Batang Pandilla Project.
Suno kay Laudato, ang 273 ka mga pamatan-on nga miyembro sang nasambit nga proyekto ang ginabug-usan sang 25 ka gang sa syudad sang Iloilo.
Santo sa record, ginpahayag ni Laudato nga ang mga pamatan-on nga miyembro sang Project BONG ang naga-edad sang 12 anyos tubtub 31 anyos.
Sa pagpaathag sang natungdan, daku ang nabulig sang nasambit nga proyekto sa pagnubo sang krimen sa syudad sang Iloilo bangud nga ang mga pamatan-on nga nagaliho-liho sadto ang ginapaidalom sa training kag seminar.
Nagapati si Laudato nga paagi sa pagtudlo sang maayo nga paminatasan, pagpabatyag sang palangga kag pagsalig, nagabag-o ang paminatasan sang mga minor de edad nga sadto anay nagaliho-liho sa syudad sang Iloilo.
