JAMINDAN, CAPIZ – Kapin sa 400 ka mga pulis ang nag-graduate sa Community Support Program nga ginaduso sang Armed Forces of the Philippines.
Ang graduation ceremony ang ginpatigayon sa Camp Gen. Macario Peralta Jr. sa Jamindan, Capiz sa diin lakip sa mga kilala nga personalidad nga nagtambong amo sanday Police Regional Office 6 Director Police Brigadier General Rene Pamuspusan kag Lt. Col. Joel Benedict Batara, commanding officer sang 61st Infantry Batallion sang Philippine Army.
Sa interview sang Bombo Radyo kay Batara, iya ginpahayag nga naglab-ot sa 358 ka mga pulis ang nag-graduate sa community support program matapos ang tatlo ka bulan nga training sa idalom sang nasambit nga people centered program.
Katuyu-an sang nasambit nga programa suno sa natungdan amo nga makatuga sang peace and order kag development sa isa ka conflict affected barangay.
Samtang suno naman kay Police Regional Office 6 Spokesperson Police Lt. Col. Joem Malong, iya ginpahayag nga ang 100 sa mga nag-graduate nga pulis ang igabalik sa Regional Mobile Force samtang ang mga nabilin naman ang igabalik sa mga City Police Office kag Provincial Police Office nga ila ginhalinan.
Katuyu-an sang nasambit nga programa suno kay Malong amo nga maka-angkon sang maayo nga koneksyon ang pulis sa komunidad.
Magluwas diri, katuyu-an man sang community support program amo nga matapna ang pagpang-recruit sang local terrorist groups.
