ILOILO CITY – Magalab-ot sa 85% ang igabuhin sa 2018 supplemental budget sang syudad sang Iloilo.
Santo sa record, nagalab-ot sa 129 million 8 thousand 408 pesos and 9 centavos ang supplemental budget sang syudad para sa subong nga tuig.
93 million diri ang igabuhin naman sang Commitee on Appropriations sa City Council.
Sa interview sang Bombo Radyo kay City Councilor Plaridel Nava, majority floor leader kag chairman sang nasambit nga komitiba, iya ginpahayag nga kabahin sang iya katungdanan ang ginatawag nga check and balance.
Dugang pa ni Nava, katungdanan niya bilang chairman sang nasambit nga komitiba nga ipaathag sa iya mga kaupdanan kun ano ang pagahimuon sa supplemental budget sang syudad.
Kalakip sa mga igabuhin ni Nava amo ang:
-30 million pesos nga pondo para sa Land Development sang Iloilo City Sporst Arena nga pagatukuron sa Brgy. San Pedro, Molo,
-50 million pesos para sa pagatukuron nga multipurpose building sa Kerr and Company Site kag
-8 million pesos para sa pagatukoron nga one stop shop para sa construction and business permit sa 3rd floor sang City Hall
Ang mga nasambit nga proyekto suno kay Nava ang indi man makabig nga urgent ukon importante.
Ini ang rason suno sa Konsehal nga iya igabuhin ang 93 million pesos sa supplemental budget sang syudad.
Nagalaum si Nava nga paboran sang mga kaupdanan nga konsehal ang iya ginaduso.
