ILOILO CITY- Nagsaka pa sa 116,897 ka pamilya ukon 450,666 indibidwal ang apektado sang paglaslas sang bagyo Agaton sa bilog nga Western Visayas.
Sa interview sang Bombo Radyo kay Cindy Ferrer, spokesperson sang Office of Civil Defense Region 6, iya ginpahayag nga ang nasambit nga apektado nga pamilya ang naggikan sa 609 ka mga barangay.
Suno kay Ferrer, sa mga apektado nga pumuluyo, yara sa 16,968 pamilya ukon 51,880 indibidwal ang nagapabilin sa mga evacuation centers.
Sa probinsya sang Iloilo ang mga evacuees ang yara sa 12,312 pamilya ukon 47,963 samtang sa Capiz, yara ini sa 3988 pamilya ukon 11,547 ka mga indibidwal.
Pahayag ni Ferrer, base sa assessment, tubtob subong, wala pa ginapahunugutan nga makabalik sa ila mga puluy-an ang mga evacuees bangud padayon pa nga mataas ang lebel sang tubig baha.
