Molo, Iloilo City – Gin-athag ni Punong Barangay Eliezer ‘Esing’ Villanueva sang Barangay South San Jose, Molo, Iloilo City nga ginapanag-iyahan sang iya bayaw nga si Alfonso Lagtapon ang duta kun sa diin ginpatukod ang drainage system sa amo nga lugar.
Lain ini sa pahayag sang mga tag-reklamo nga si Alfonso Tan ang nagpatigayon sang drainage system.
Sa interview sang Bombo Radyo kay Villanueva, iya ginpahayag nga kasugpon ang ginpatukod nga drainage system sa ginpaobra man nga drainage ni Iloilo City Mayor Jerry Treñas.
Suno pa kay Villanueva, masami nagahalin man sa iya bulsa ang kwarta sa pag-declog sang imburnal sa amo nga area.
Nagpasalig man si Villanueva nga indi magresulta sa pagbaha ang ginpatukod nga drainage system.
Nagkomiter pa ang natungdan nga sa tion nga magdanaw ang lugar, manaog ini sa pwesto bilang punong barangay.
