Nag-anaw sang dugo sa sulod sang balay sang isa ka barangay kapitan sa Sto. Tomas, Batangas matapos ini ginpatay paagi sa pagtiro sang armado nga lalaki.
Ginkilala ang biktima nga si Dennis Austria, 50 anyos, kapitan sang Brgy. Sta. Anastacia.
Suno sa inisyal nga report sang Batangas Provincial Police Office (PPO), natabo ang insidente sang mga alas-6:00 sang aga kahapon, Oktubre 15, esa isa ka subdivision sa nasambit nga lugar.
Ginapahayag nga yara sa sulod sang iya puluy-an si Kapitan Austria sang gulpi lang nga nag-abot ang duha ka lalaki nga nagasakay sa motorsiklo.
Isa sa mga suspetsado ang nagsulod sa balay sang biktima kag gilayon nga ginpaulanan ini sang bala, samtang ang isa naman ang nagserbe nga lookout sa gwa sang balay.
Madasig nga nagpalagyo ang mga suspetsado sakay sa motorsiklo padulong sa wala pa matumod nga direksyon.
Gindala pa sa ospital ang biktima apang gindeklarar ini nga dead-on-arrival sang mga doktor.
Sa karon, padayon ang maid-id nga imbestigasyon sang mga otoridad agud matumod ang matuod nga motibo sa likod sang krimen kag madakpan ang mga responsable.
Ginalantaw sang mga imbestigador ang pila ka anggulo, lakip na ang personal nga hiligut-anon ukon may kaangtanan sa iya trabaho bilang Kapitan sang Barangay.
