Ginsaysay sang kapitan sang barko nga MV Hirman Star ang ila eksperyensya matapos nga ma-stranded ang cargo vessel sa Iloilo-Guimaras Strait sa sulod sang tatlo ka bulan.
Sa exclusive interview sang Bombo Radyo sa kapitan nga taga-Bacolod City apang sa Cavite nagapuyo sa iya pamilya, nagsiling siya nga nag-abot ang barko sang Agosto 2024 kag gindeklarar nga unseaworthy pa sang Setyembre.
Suno sa iya, Abril pa sila nagsakay apang guba na ang gyrocompass sang barko kag ginpilit sila nga maggamit sang magnetic compass.
Wala sila ginapadal-an sang supply kag suporta halin sa tag-iya, lakip na ang pagkaon kag sweldo.
Nagapangayo pa sila sang bulig sa mga mangingisda para lang may makaon.
Bangud sini, nag-antos sila sa kalisod tubtob nga kahapon, Lunes, narescue sila sang Department of Migrant Workers, OWWA, Bureau of Immigration kag Philippine Coast Guard, sa bulig man ni Iloilo City Lone District Representative Julienne JamJam Baronda.
May 13 tanan ang sakay sang barko — 7 ka Indian Nationals kag 6 ka Filipino nga halin sa Batangas, Cebu, Bacolod City, Estancia, San Joaquin, kag Tigbauan.
