Tatlo ka national government agencies sa Iloilo ang nakabaton sang mga bag-o nga service vehicles halin sa Iloilo Provincial Government bilang kabahin sang padayon nga panikasog sang kapitolyo nga mapabaskog ang serbisyo sa mga pumuluyo sa lokal nga lebel.
Sa interview sang Bombo Radyo kay Engr. Carmelo Orbista, Provincial Director sang Department of the Interior and Local Government sa probinsya, ginpahayag niya nga isa ka pick-up vehicle ang gin-turn-over sa DILG-Province para magamit sa ila operasyon.
Ang Bureau of Jail Management and Penology naman ang nakabaton sang Persons Deprived of Liberty (PDL) transport vehicle nga may layunin nga mapadali kag mapasiguro ang pagdala sang mga detainees sa legal kag medikal nga transaksyon.
Samtang, ang Bureau of Fire Protection nakabaton man sang isa ka pick-up unit, apat ka printers kag isa ka laptop agud mapabaskog ang ila administrative operations.
Suno kay Orbista, ang inisyatibo kabahin sang padayon nga pagsuporta sang probinsyal nga gobyerno sa mga frontline agencies agud masiguro ang epektibo nga governance, kaluwasan kag serbisyo publiko sa barangay level.
