ILOILO CITY – May yara na sang lead ang Iloilo City Police Station 1 sa mga suspek nga nagsalisi sa isa ka vendor sa Iloilo Terminal Market kag nagtaban sang cash nga ginabanta P500,000 nga pangbayad kuntani sang utang.
Ang nabiktima nga vendor amo si Rosemarie Catalbas nga may pwesto sa amo nga merkado.
Sa interview sang Bombo Radyo kay Police Captain Peter John Ramos, hepe sang Iloilo City Police Station 1, iya ginpahayag nga padayon ang ila pagsunod sa mga closed circuit television kun sa diin, nakita ang motorsiklo kag ang pag-uba sang mga suspek sang ila nga helmet.
Suno pa kay Ramos, may ginasundan naman sila nga persons of interest nga may anggid sa mga tawo nga nakita sa closed circuit television nga nagsulod sa pwesto sang vendor.
Nakapakig-angut naman sila sa mga barangay officials nga aktibo nga naga-cooperate sa ila.
Pahayag pa ni Ramos, ang modus sang duha amo ang pagpangsalisi.
Nagpasalig man ini nga padayon ang imbestigasyon sang kapulisan agud nga makilala-an ang mga suspek.
