ILOILO CITY – Nagpanugyan ang kapulisan sa publiko nga mangin vigilante sa tion nga magbyahe ukon magsakay sa depampasahero nga mga salakyan.
Ini ang kasunod sang natabo nga pagpang-harass sa isa ka 18-anyos nga estudyante samtang nagasakay sa jeep nga may byahe Jaro CPU.
Sa interview sang Bombo Radyo kay Police Captain Peter John Ramos, hepe sang Iloilo City Police Station 1, iya ginpahayag nga bisan ano ka kapoy halin sa eskwelahan ukon sa trabaho, likawan nga magtulog sa public utility vehicle.
Sa tion nga may matabo nga anuman nga sahi sang harassment, mag-report gilayon sa pinakamalapit nga police station agud nga madakpan ang mga nagapang-harass.
Kun balik-balikan, nag-report sa kapulisan ang isa ka estudyante sa isa ka kolehiyo sa syudad bangud ginsunod ini sang wala pa nakilal-an nga lalaki.
Humalin sang nagsakay ini sa jeep kag naglakat padulong sa minibus nga ginasakyan agud nga magpauli sa probinsya, ginsundan ini sang lalaki kag ginahagad nga magkaon kag magpanigarilyo.
Ginpangayo pa sini ang iya contact number apang ang numero sang iya kahagugma ang ginhatag niya.
Base pa sa panumbungon sang estudyante, gin-agbayan pa ini sang lalaki, ginkaptan ang balikawang kag ginhana nga halukan.
Bangud sang tuman nga kakulba, wala na nakapangayo pa sang bulig ang biktima.
Base sa pag-chekyar sang kapulisan sa closed circuit television sang minibus, nagakalo ang lalaki kag nakasuksok sang face mask.
