ILOILO CITY– Padayun ang ginahimo nga paglibot sang mga kapulisan sa syudad sang Iloilo matapos liwat nga ginbalik ni Iloilo City Mayor Jerry Treñas ang liquor ban.
Sa interview sang Bombo Radyo kay Iloilo City Police Office Director Pol. Col. Eric Dampal, iya ginpahayag nga nagalibot na ang mga kapulisan sa syudad agud magbantay kag magpatuman sang executive order ni Mayor Treñas.
Suno kay Dampal, luyag nila nga mapatuman sang insakto ang executive order sang alkalde kag sundon ini sang mga pumuluyo sa syudad.
Pahayag pa niya may mga narekord ang tagsa ka police stations sa syudad nga mga insidente may kaangtanan sa pag-inom sang makahulubog nga ilimnon.
Nagapanawgan man ang mga natungdan sa mga pumuluyo nga maghugpong agud mas mangin malinong kag matawhay ang syudad, bangud ang tinutuyo sang executive order amo ang kaayuhan sang tanan.
Nahibaluan nga santo sa rekord may yara sang apat ka kaso sang liquor intoxication incidents sa Police Station 1, anom sa Station 2, duha sa Station 3, duha sa Station 4, anom sa station 5 kag anom man sa station 6.
