ILOILO CITY – Gin-ako sang kapulisan nga pila ka beses sila nga naisahan ni Richard Prevendido, ang napatay nga top drug lord sa Western Visayas.
Sa interview sang Bombo Radyo Iloilo, ginpahayag ni IPPO director S/Supt. Marlon Tayaba, ground commander sa ginpatigayon nga operasyon, pila ka beses sila nga ginpatalang ni Prevendido kun sa diin bilog nga isla sang Panay ang ila ginhalughog apang mailap nga dakpon ang drug lord.
Ang mga impormasyon kaangay sang pagpakuno-kuno ni Prevendido nga ang Cuban leader nga si Fidel Castro kag isa ka Ati, ang lunsay patalang sa mga otoridad kag publiko.
Wala sang pagbag-o suno kay Tayaba sa dagway kag lawas sang drug lord magluwas nga ini ang nagtambok.
Isa man sa mga pamaagi ni Prevendido agud malutsan ang mga otoridad ang paggamit sang life size nga cut out ukon standee sang iya kaugalingon, pagsaylo-saylo sang lugar kag “pasa bilis”.
Samtang nagapanago sa Jaro, wala man gaguwa pirme sa puluy-an ang drug lord kag ginadul-ungan lang sang pagkaon.