ILOILO CITY- Wala gihapon malab-ot sang Police Regional Office 6 ang ideal ratio sang pulis sa populasyon nga 1:500 ukon isa ka pulis sa 500 ka pumuluyo.
Sa interview sang Bombo Radyo kay Pol. Lt Col Joem Malong, tagpamaba sang Police Regional Office 6, iya ginpahayag nga kulang gihapon ang pwersa sang kapulisan sa rehiyon.
Suno kay Malong,ang ratio sang pulis sa populasyon sa mga provincial police offices sa rehiyon amo ang masunod:
1:618 sa Aklan Police Provincial Office
1:865 sa Antique Police Provincial Office
1 :889 sa Capiz Police Provincial Office
1:668 sa Guimaras Police Provincial Office
1:1193 sa Iloilo Police Provincial Office
1:1459 sa Negros Police Provincial Office
1:837 sa Bacolod City Police Office
1:758 sa Iloilo City Police Office
Bangud sini, ginpahayag ni Malong nga padayon ang ila recruitment agud madugangan ang pwersa sang Police Regional Office 6.
Suno kay Malong,may duha ka mga recruitment cycles nga ginapatigayon ang Police Regional Office 6 kada tuig.
Una, amo ang regular recruiment nga may yara sang regular quota agud mag-fill up sang kulang nga pwersa.
Ikaduha, amo ang attrition recruitment para buslan ang nabakante nga posisyon sang mga pulis nga naga-retiro ukon nagaka-dismiss sa serbisyo.
