ILOILO CITY – Nabudlayan ang mga kapulisan sa probinsiya sang Iloilo nga magdakop sang mga nagapataya sang bookies, isa ka sahi sang iligal nga sugal.
Ginpahayag sa Bombo Radyo ni Iloilo Provincial Police Office (IPPO) director S/Supt. Marlon Tayaba nga mabudlay na arestuhon ang iligal nga nagapataya bangud nga ginapaagi na lang sa text ang operasyon.
Suno kay Tayaba, gina-text na lang sang mga manugtaya sa kuridor ang numero kag ang kuridor i-text man sa mga nagataya ang resulta.
Nagakuha ang mga ini sang resulta sa bola sang Small Town Lottery (STL) sa siyudad sang Iloilo.
Nahibaluan nga nauntat na ang operasyon sang STL sa probinsiya sang Iloilo matapos nga wala makabayad ang operator sadto nga Eagle Crest Gaming Corporation.