ILOILO CITY – Wala ginadula sang kapulisan ang posibilidad nga may yara sang nagsugo sa mga nadakpan nga suspek sa pagpatay sa waiter sa Brgy. North Fundidor, Molo, Iloilo City.
Ang biktima amo si Alejandro Panes, residente sang Zone III Brgy. Dulonan Arevalo, waiter sa MO2 bar sa Glicerio Pison Benigno Aquino Drive Mandurriao.
Ang mga ginatudlo suspek naman amo sanday Ricardo Amoroso alias Rex Amoroso nga amo ang gunman; Rene John Inesoria nga driver sang gunman; kag ang mga lookout nga sanday Jesus Gecanaya kag Jurex Amoroso.
Sa interview sang Bombo Radyo kay Police Major Shella Mae Sangrines, spokesperson sang Iloilo City Police Office, iya ginpahayag nga posible nga may yara sang tawo sa likod sang krimen magluwas sa mga nadakpan.
Suno kay Sangrines, ginahibalo pa kun sin-o ang babayi nga nakaba-is sang biktima sa sulod sang bar.
Posible suno sa natungdan nga konektado si Amoroso sa nakaba-is sang biktima.
Samtang, ginahanda na ang mga kaso nga ipasaka sa mga suspek kag sa apat ka iban pa nga nadakpan sang kapulisan.
Ang iban pa nga mga gin-aresto sang kapulisan apang indi konektado sa krimen amo sanday Julius Inesoria kag Johnley Cadiz nga nakuhaan sang iligal nga droga, armas kag explosives.
Arestado man John Mendez nga nakuhaan sang iligal nga droga kag armas.
Si Maila Inesoria ang arestado man kag pasakaan sang kaso nga Obstruction of Justice.
