ILOILO CITY – Suportado sang Karapatan, isa ka Human Rights group ang nangin lihok sang gobyerno sa pag terminate ukon pagdula sang Visiting Forces Agreement sa tunga sang Pilipinas kag Estados Unidos.
Sa interview sang Bombo Radyo kay Reylan Vergara, vice chair sang Karapatan, iya ginpahayag nga madugay na nila ginahingyo sa gobyerno ang pagbasura sang Visiting Forces Agreement bangud ginagamit lamang sang Estados Unidos ang layi sang Pilipinas agud nga makaangakon sang dunang manggad.
Suno kay Vergara, wala sang may nahatag nga benepisyo sa pumuluyo ang Visiting Forces Agreement sa Estados Unidos.
Madamo man suno sa iya nga ginlapas ang Estados Unidos sa mga kasuguan sa Pilipinas lakip na ang pag-upod sang U.S military forces sa mga military operation sang Pilipinas.
Pahayag ni Vergara, hugot nga ginapamatukan sang grupo ang mga lihok nga ginahimo sang U.S military forces sa Pilipinas bangud sa paglapas man sang soberanya kag pagkontrol sa pungsod.
Paathag sang natungdan, indi na kinahanglan pa sang Pilipinas sang partner ukon iban nga pungsod agud nga ihanas ang mga militar bangud mismo ang mga Pilipino ang may yara man sang ikasarang kag kapasidad nga himuon ini.
