ILOILO CITY – Todo panginwala ang karelasyon sang scammer nga nadakpan sa Barangay PHHC Blk 22, Mandurriao, Iloilo City nga may nahibaluan ini sa ginahimo sini nga pagpangtonto.
Ang arestado amo si Ana Mallorca Pedrajas, 49, residente sang Barangay Poblacion South, Oton, Iloilo.
Sa interview sang Bombo Radyo kay Daisy Tanlangco, residente sang Hipodromo, Iloilo City Proper, myembro sang lesbian, gay, bisexual, and transgender (LGBT) kag live in partner ni Pedrajas, iya gin-athag nga wala siya sang ideya nga scammer ang iya karelasyon.
Suno kay Tanlangco, manug-isa ka tuig pa lang ang ila relasyon ni Pedrajas.
Ginpahayag sini nga siya ang ginasugo ni Pedrajas nga magkuha sang kwarta sa money remittance sa diin ginarason sini nga naghalin ini sa iya tiya.
Apang wala sila makahibalo nga ang ginakuha sini nga kwarta ang halin sa pagpanunto.
Blangko naman si Tanlangco kun ngaa nahimo ni Pedrajas ang magpang-scam.
Matandaan nga nadakpan si Pedrajas matapos nagpangawat sang wallet sang iya landlord.
Sang gin-aresto sang Mandurriao Police Station, natukiban nga may yara ini sang warrant of arrest bangud sa pagpang-scam.
Nakuhaan man ini sang madamo nga mga identification document (ID) kag may nagkalain-lain nga mga address.
Sang ginbukad ang iya rekord pinaagi sa social media patrolling, natukiban nga siya ang ginapangita nga scammer sa diin daw kaangay nga ginapang-hypnotize sini ang iya mga biktima.
Ang iya ginahimo amo ang pagpang-recruit sang mga luyag magtrabaho sa airport bilang checker ukon encoder.
Diri kag pangayuan na sini sang kwarta ang iya mga biktima para sa medical eximination kag mapadasig ang pagproseso sang ila papeles.
Matapos makuha ang kwarta, indi na ini ma-contact.
Magluwas diri, nagapakilala man ini nga broker kay may amo nga Chinese.
Sa subong, preso si Pedrajas sa Mandurriao Police Station.
