Nakuhaan sang P3.4 million pesos nga balor sang illegal nga droga ang isa ka kargador sa ginpatigayon nga high impact operation sang Iloilo City Drug Enforcement Unit (CDEU) kaupod ang Regional Police Drug Enforcement Unit (RPDEU) 6.
Ang subject amo si Lemuel Hermano, aka “Bulldog” (HVI), single, 38-anyos kag residente sang Brgy. Rizal Pala Pala II, City Proper, Iloilo City.
Sa interview sang Bombo Radyo kay Police Captain Ryan Christ Inot, head sang City Drug Enforcement Unit, iya ginpahayag nga nagaserbe nga runner si Bulldog kag ang source sini amo si Alyas Ashong nga yara sa sulod sang Bureau of Jail Management and Penology apang wala pa matumod kun sa diin lugar.
Suno kay Inot, ang estilo sang operasyon ni Bulldog amo ang online transaction kun sa diin gina-send sini ang picture kun sa diin niya ginabilin ang iligal nga druga kag online man ang pagbayad sa iya.
Sa subong, yara na sa kustodiya sang Iloilo City Police Station (ICPS) 4 ang arestado kag magapangatubang sang kaso nga paglapas sa Republic Act (RA) 9165 ukon Comprehensive Dangerous Drugs Act of 2002.
