Nagasalalampaw nga gold medals ang nakuha sang Pinoy gymnast nga si Karl Eldrew Yulo sa 3rd JRC Artistic Gymnastics Stars Championships sa Bangkok, Thailand.
Magluwas sa una sini nabulsa nga bulawan nga medalya sa individual all-around, nagkampyon man ang 16-anyos sa Men’s Artistic Gymnastics (MAG) Junior floor exercise, still rings, kag vault events.
Nadag-an man sini ang silver medal sa parallel bars.
Nagdangat tanan sa anum ang iya natipon nga medalya lakip ang isa pa gid ka silver sa all-around team event.
Ang iban pa nga Pinoy gymnasts nga multi-gold medalists sa kumpetisyon amo sanday Jacob Alvarez, Andrei de Leon, Prince Sumabal, Chelsea Lynn Hong, kag Ma. Elizabeth Medina.
Si Karl Eldrew amo ang manghod sang two-time Olympic gold medalist nga si Carlos Edriel Yulo.
Sang damlag lang, gin-anunsyo nga nagahanas na ini kaupod ang manghod nila nga si Elaiza sa idalom sang Japanese coach nga si Munehiro Kugimiya nga long-time coach ni Caloy.
Una na nga ginkumpirma sang Gymnastics Association of the Philippines (GAP) nga isa man si Karl Eldrew sa ginalantaw nga updon sa 2028 Los Angeles Summer Games nga kun matabo makaupod sa iya magulang nga si Caloy nga magabalik naman para sa iya ikatatlo nga Olympiada.
