Kasadyahan sa Kabanwahanan 2026, balantayan subong nga adlaw

Balantayan subong nga adlaw ang “Kasadyahan sa Kabanwahanan” nga isa sa highlights sang 2026 Dinagyang Festival.

Patigayunon ini sa Iloilo Freedom Grandstand kag sa Iloilo Sports Complex.

Mangin performance area man ang Corner Huervana-Luna St. sa La Paz apang wala sang judges kag indi man i-ubos pakita ang props suno sa organizers.

Walo ka mga banwa ang magapasundayag sang ila pinasahi kag matahum nga local festivals para sa 2026 edisyon sang Kasadyahan nga amo ang mga masunod:

Jimanban Festival sang New Lucena
Kahilwayan Festival sang Sta. Barbara
Salakayan Festival sang Miagao
Pagnahi-an Festival sang Bingawan
Tultugan Festival sang Maasin nga amo ang two-time Kasadyahan champion
Kasag Festival sang Banate
Tawili Festival sang San Rafael
kag Banaag Festival sang Anilao.

Sa interview sang Bombo Radyo kay Bombette Marin, ang pinuno sang Iloilo Provincial Culture, Arts, History and Tourism Office, kada banwa ang nag-representar sang ila tagsa ka festival kag nagsalamin sang tourism brand sang Iloilo nga “Fun, Foodie, Friendly.”

Una na nga naghatag sang suporta ang Iloilo Provincial Government paagi sa pag-alokar sang tag-P2-million para sa kada banwa nga nagpasakop.

Magabaton naman sang P1.2-million nga cash prize ang kampyon sa sini nga kumpetisyon. Nagahulat naman ang P700,000 para sa second placer; P500,000 sa third place winner; kag tag-P200,000 bilang consolation prize sa iban nga competing tribes.

Kasunod sang Kasadyahan, balantayan man buwas, Enero 25, ang Dinagyang Tribes Competition kun sa diin may pito ka mga tribu nga magapasakop.