ILOILO CITY- Sa baylo nga sa aga, sa hapon na maga-umpisa ang Kasadyahan sa Kabanwahanan nga natalana sa Enero 27,2024 bilang isa sa mga balantayan nga kahiwatan sa Dinagyang Festival.
Sa interview sang Bombo Radyo kay Governor Arthur Defensor Jr., iya ginpahayag nga luyag sang Iloilo province nga i-emphasize ang “color” kag “lights” sa mga costumes sang mga tribu nga magapartisipar.
Sa Kasadyahan sa Kabanwahanan 2024, siyam ka mga tribu sa probinsya ang magapa-indis indis.
Ang ini nga mga tribu amo ang Katagman festival sang Oton, Pantat festival sang Zarraga, Kaing festival sang Leon, Saad festival sang Leganes, Cry of Jelicuon sang New Lucena, Tultugan festival sang Maasin, Hinirugyaw-Suguidanonay festival sang Calinog, Kasag festival sang Banate, kag Banaag festival sang Anilao.
Suno kay Gov. Defensor, apisar nga luyag sang probinsya nga maakomodar ang madamo nga tribu, apang may yara lamang sila sang limitado nga oras.
Ang pagbutang sang Kasadyahan sa Kabanwahanan 2024 sa hapon pahayag sang gobernador, ang magahatag sang tion agud nga makaupod ang mga tribu sa religious sadsad kag makahatag man sang kusog sa mga Ilonggos kag dumuluong nga maka-enjoy sa merry- making.
