Indi gilayon mabasura sang International Criminal Court (ICC) ang crimes against humanity charges batok kay anay Presidente Rodrigo Duterte kun mapamatud-an nga indi niya makaya mag-atubang sa mga hearing, suno kay ICC Registered Assistant Counsel Kristina Conti.

Ginhimo ni Atty. Conti nga nagserbe man nga counsel para sa mga biktima sang war on drugs sang anay presidente, matapos ipagguwa ang isa ka dokumento angot sa pag-appoint sang ICC Pre-Trial Chamber sang tatlo ka miyembro sang panel sang independent experts para busision ang medikal nga kondisyon ni Duterte.

Ginpahayag man ni Conti nga kun magguwa ang reports nga unfit si Duterte, iga-adjourn lang sang ICC judges ang kaso kag indi ibasura.

Magapadayon man suno sa iya ang anay presidente sa kustodiya sang ICC kag pagatun-an ang kaso kada 120 days ukon kada apat ka bulan.

Apang, kun makumbinsi sang medical reports ang mga judges nga ideklara nga fit si Duterte para mag-atubang sa trial, liwat nga italana ang schedule para sa hearing sa confirmation charges.

Nagalaom man suno sa iya nga maisapinal ang mga kaso kag maumpisan ang hearing sa masunod nga tuig.