Napasaka na ang kaso batok sa pulis nga amo ang driver sang ambulansya sang Regional Medical and Dental Unit sang Police Regional Office (PRO) 6 nga nakabunggo sa isa ka 18-anyos nga estudyante sa Brgy. Dungon B, Jaro, Iloilo City.
Sa interview sang Bombo Radyo kay Police Major Shella Mae Sangrines, spokesperson sang Iloilo City Police Office, iya ginpahayag nga kahapon, natigayon na nga mapasaka ang kaso nga reckless imprudence resulting in homicide batok sa driver nga may ranggo nga Police Corporal.
Suno kay Sangrines, sang Hunyo 4 natabo ang insidente samtang nagalakat ang biktima kag nagatabok pakadto sa Westwoods sa Brgy. Dungon B kun sa diin base sa resulta sang imbestigasyon, na-alang-alang ang ambulansya nga padulong kuntani sa Iloilo Police Provincial Office kag aksidente nga nabungguan ang biktima.
Bangud sa mabaskug nga impact, natabog ang biktima sang pila ka metros, nga rason sang pilas sa iya ulo kag pagkalipong.
Natigayon pa nga madala ini sa ospital kun sa diin nagpaidalom pa sa pila ka operasyon, apang sang Hunyo 12, gindeklarar siya nga napatay.
Suno sa ginikanan sang biktima, wala pa sila sang nabaton nga pinansyal nga bulig halin sa PRO 6 para sa bill sa ospital.
Apang gin-athag man sang iloy sang biktima nga naka-contact na sa ila ang asawa sang nasambit nga pulis kag nagpalab-ot sang bulig pinansyal.
Padayon pa ang imbestigasyon sang mga otoridad may kaangtanan sa insidente kag sa kaso nga ginpasaka batok sa pulis nga driver sang ambulansya.
